Biography

Si Atty. Hardy an pinakaaki na Chief Legislation Officer sa senado kan Pilipinas. Siya direktang nagtatrabaho kay Senador Sonny Angara na kung saen siya man an nagsirbing Acting Executive Director kan komite sa Senado pag abot sa Ways and Means .

Siya nagtapos kan saiyang pag-aabogasya sa Unibersidad kan Pilipinas asin nakapasa bilang abogado kan taon 2009 (dos mil nueve). Kan taon 2012 (dos mil dose) saiyang pinadagos an Master of Laws in International Taxation sa eskwelahan para abogasya kan New York University bilang sarong Fulbright iskolar kan Estados Unidos asin man puminasar bilang sarong abogado sa New York kan taon 2013 (dos mil trese). Kan taon 2014 (dos mil katorse) siya nag-adal gilayon bilang sarong iskolar sa Harvard Kennedy School of Government sa Estados Unidos bilang preparasyon sa pagsirbe sa banwaan. Saro man po si Atty. Hardy na lisensyadong akawntant poon kan taon 2004 (dos mil kwatro) pakatapos niya mag adal sa De La Salle University na nagtapos na igwang academic honor.

Saro man po si Atty. Hardy na paratukdo. Siya naging Bise Presidente asin Executive Director kan Forbes College asin Forbes Academy sa Legazpi. Nagtukdo man siya bilang sarong propesor sa Unibersidad kan Aquinas sa mga nagkukuha nin pag-aabogasya. Kan Marso 2015 natawan siya nin unra na maging saro sa mga Board of Regents kan Bicol University. Abogado man po siya kan Philippine Crop Insurance Corporation na nagtatabang sa mga paraoma, Presidente siya kan Aquende Scholarship Foundation, buda aktibo po siya sa pagtabang sa mga kaakian bilang adviser kan sarong grupo nin mga jovenes digdi sa Bicol na iyo an Kabataan Para Sa Bayan. Sa pagpapadagos kan saiyang pagtubod asin paglaom na ang edukasyon importantehon na marhay para maiangat sa an satong mga pamilya, minukna niya kan taon 2013 (dos mil trese) ang Aquende Scholarship Foundation hale sa mga regalo kan siya po ikinasal.

Bago pa man siya nagtrabaho sa gobyerno, nagsakripisyo nguna siya magtrabaho bilang sarong abogado sa pinakadakulang opinina nin mga abogado sa Manila kung saen niya nakasabay sina Senator Ed Angara buda Senator Frank Drilon. Kan maging presidente si PNoy, nagsirbe si Atty. Hardy bilang Special Prosecutor laban sa mga darakulang kumpanya na nagdadaya asin dai nagbabayad kan buwis sa satuyang gobyerno.

Dahil sa saiyang mga adbokasiya para sa edukasyon, mga kababaihan, mga kaakian asin para sa paguswag kan komunidad, siya po ninominar ka taon 2013 (dos mil trese) nina Senate President Frank Drilon asin DSWD Sec. Dinky Soliman para kuta mamayo kan National Youth Commission. Padagos an pag-inguha ni Atty. Hardy para maibalik niya sa komunidad na naging marhay sa saindang pamilya sa paagi kan pagbusol kan saiyang mga adbokasiya sa pagreporma kan edukasyon, pagtao ki kusog asin direksyon sa mga kaakian, paglaban sa korapsyon asin pagsirbe sa mga tawong nangangaipo.